Վերջին տասնամեակներուն հանրային գրադարաններուն մէջ ընթերցողական կազմի փոփոխութիւններու բերումով Հայաստանի գրքային ամսական քարտէսին վրայ յայտնուող գիրքերուն անունները կարելի է գոնէ մօտաւոր ճշգրտութեամբ կռահել: Պատճառն այն է, որ ընթերցողներուն մեծամասնութիւնը դպրոցականներ եւ ուսանողներ են: Ուստի բնական է, որ տուեալ ամսուան քարտէսին վրայ յայտնուին ուսումնական ծրագիրներով յանձնարարուող գիրքերուն շապիկները:

Մինչդեռ ժամանակակից հեղինակներու ինքնուրոյն եւ թարգմանական գրականութիւնը գրքային քարտէսներուն վրայ յայտնուելու համար պէտք է իր ճամբան ինքնուրոյն եւ մրցակցային պայքարով հարթէ: Մեր գրառումներուն հետեւողները քարտէսին վրայ կը տեսնեն միայն որեւէ ամսուան ընթացքին տուեալ նահանգի գլխաւոր գրադարանին մէջ ամենէն շատ կարդացուած գիրքին շապիկը: Մինչդեռ գրադարաններու միացեալ համադրուած վիճակագրութեամբ կազմուող ամէնէն շատ կարդացուած գիրքերու տասնեակը միշտ տարբեր կ՚ըլլայ:

Ներկայիս մեր երկրի հանրային գրադարաններէն մօտ 300 հազար ընթերցող կ՚օգտուի, որ փոքր ինչ պակաս է բնակչութեան ընդհանուր թիւի 10 տոկոսէն: 2024 թուականին ամէնէն ընթերցուող գիրքերու ցուցակներու կազմումին հանրապետութեան բոլոր 10 մարզերէն 15 գրադարան եւ գրադարանային համակարգ մասնակցած է: Ցուցակին վրայ մշտապէս 100-110 գիրք կ՚ըլլայ, ուր մշտական հեղինակներ կան՝ Րաֆֆի, Նար-Դոս, Վարդգէս Պետրոսեան, Ակաթա Քրիսթի, Ալեքս Մայքլիտիս, Ուիլիամ Սարոյեան, Ռեմարք, Խալետ Հոսէյնի, Էլիֆ Շաֆաք եւ շատ ուրիշներ:

Ծանօթացէք դեկտեմբերին Հայաստանի գրադարաններուն մէջ առաւել շատ ընթերցուած եւ պահանջուած գիրքերու տասնեակին: Ինչպէս կը տեսնէք՝ առանձին գրադարաններու եւ համադրուած ընթերցանութեան միացեալ ցուցակներուն վրայ միայն երկու գիրք կը կրկնուի: Անոնք են ցուցակի 1-ին եւ 2-րդ դիրքերուն գիրքերը. 

• Վահան Թոթովենց «Կեանքը հին հռոմէական ճանապարհին վրայ» 
• Աշոտ Աղապապեան «Սեւ յովազ» 
• Ալեքսանդր Շիրուանզադէ «Քաոս» 
• Ճաք Լոնտոն «Մարթին Իտէն» 
• Օլտոս Հաքսլի «Չքնաղ նոր աշխարհ» 
• Ժոզէ Սարամակու «Կայէն» 
• Գոհար Նաւասարդեան «Սիրելէն ետք» 
• Ռուբէն Եսայեան «Թունելէն 13 քմ. հեռաւորութեան վրայ» 
• Վարդգէս Պետրոսեան «Վերջին ուսուցիչը» 
• Ռուբէն Եսայեան «Վանականները գաղտնիք ունին»

Աշոտ Աղապապեանի «Սեւ յովազ 1» եւ «Սեւ յովազ 2» վէպերը ցուցակին երկրորդ դիրքին վրայ են գլխաւորաբար Երեւանի եւ Տաւուշի նահանգի ընթերցողներուն աջակցութեամբ: Իսկ Կոտայքի, Արարատի, Վայոց ձորի եւ Սիւնիքի մարզերու պատանեկան տարիքի ընթերցողներուն աշխուժութեան շնորհիւ դեկտեմբերեան տասնեակին մէջ ժամանակակից գրող Ռուբէն Եսայեանը միանգամայն երկու գիրքով ներկայ է: