Ազգային գրադարանը այսօր արժէքաւոր նուէրներ ստացաւ։ Կամերային երաժշտութեան տան մէջ տեղի ունեցաւ երգահան Տիգրան Մանսուրեանի «Մեներգեր» ժողովածուի շնորհանդէսը եւ մամլոյ ասուլիսը։ Գիրքը կ՚ընդգրկէ երգահանին 1966-էն մինչեւ 2024 թուականին գրուած ստեղծագործութիւնները։

«Ես շատ ուրախ եմ, որ կայ այս ժողովածոն։ Իբրեւ երաժիշտ, ինքզինքս կը համարեմ հայոց լեզուի զաւակը։ Հետեւաբար, թէ՛ այս գիրքը, թէ՛ յետագայ հատորները, որոնք ես յոյս ունիմ, որ լոյս պիտի տեսնեն, ատոնք ամբողջութեամբ հայ քերթողութիւն են, հայ արուեստ են...», իր խօսքին մէջ ըսաւ Տիգրան Մանսուրեանը։

Շքեղ տպագրութեամբ մեծադիր հատորի շապիկին վրայ Մարտիրոս Սարեանի «Ծաղիկներ» մեռեալ բնութեան արտատպութիւնն է, որ Վարպետը նկարած է 1916 թուականին։ Տիգրան Մանսուրեանի ստեղծագործութիւնները ներկայացուած են ժամանակագրական սկզբունքով։ Հայերէն գրութիւններուն կից ձայնանիշերուն մէջ առկայ է լատինատառ հնչիւնային վերծանումը։ Ժողովածոյին մէջ կարելի է գտնել Կարսիա Լորքայի, Նահապետ Քուչակի, Պաղտասար Դպիրի, Մատթէոս Զարիֆեանի, Աւետիք Իսահակեանի, Վահան Տէրեանի, Եղիշէ Չարենցի, Համո Սահեանի, Ռազմիկ Դաւոյեանի խօսքերով գրուած ստեղծագործութիւններու նօթագրութիւնը եւ շարադրումը՝ հայերէն եւ անգլերէն թարգմանութեամբ։

Միջոցառումը կազմակերպուած էր Մանսուրեանի անուան երգահաններու 3-րդ միջազգային մրցոյթի շրջանակէն ներս, որ կազմակերպուած է «Կողբ» հիմնադրամի կողմէ։ Միջոցառման աւարտին Տիգրան Մանսուրեանի «Մեներգեր» ժողովածոն հիմնադրամին կողմէ բաշխուեցաւ Երեւանի երաժշտական դպրոցներու եւ գրադարաններու խումբի մը։