Արամ Խաչատուրեանի ինքնագիր համերգային ծրագիրը կը պահուի Հայաստանի ազգային գրադարանի ինքնագիրներու հաւաքածոյին մէջ։ Խաչատուրեանը իր ստորագրութեան կից նաեւ իւրայատուկ ձայնանիշային էքսլիպրիսանման պատկեր մը գծած է ծրագրի էջին վրայ։ Երաժշտական Հայաստանի մէջ՝ «Արմենիա» միջազգային երաժշտական 8-րդ փառատօնի այս օրերուն, կը ներկայացնենք այդ բացառիկ նմուշը։

Համերգային յայտագիրը տպուած է Պէյրութի մէջ 1961-ին, որմէ յստակ կը դառնայ, որ աշխարհահռչակ երգահանը այդ տարի համերգով հանդէս եկած է Պէյրութի մէջ։ Ծրագրին մէջ նշուած է, որ սիմֆոնիք համերգի ղեկավարն է Արամ Խաչատուրեանը, մենակատարներու շարքին ալ կը յիշատակուի Սերճո Փեթրիքարոլիի անունը։ Ծրագրի՝ Փեթրիքարոլիին նուիրուած էջին վրայ մակագրած է նաեւ ինք՝ Սերճո Փեթրիքարոլին։

Իտալացի յայտնի դաշնակահար Փեթրիքարոլին (1930-2019) 1959-ին ելոյթ ունեցած է Եգիպտոսի մէջ՝ կատարելով Արամ Խաչատուրեանի դաշնամուրի քոնչերթոն՝ վերջինիս ներկայութեամբ եւ արժանանալով մեծ երգահանի գնահատանքին։ Քահիրէի սիմֆոնիք նուագախումբին հետ Փեթրիքարոլին ու Խաչատուրեանը հանդէս եկած են Պէյրութի մէջ 1961-ին։ Համերգին օրը յայտագրին մէջ նշուած է մայիս 14։

Ըստ «Արուեստագիտական հանդէս»-ի 2023-ի 2-րդ համարին մէջ տպուած յօդուածին՝ 1961 թուականի մայիսին Արամ Խաչատուրեան այցելած է Պէյրութ, «ուր մայիս 12-ին, 13-ին եւ 14-ին տեղի ունեցած են երգահանի հեղինակային 3 համերգները, իսկ մայիս 17-ին՝ հրաժեշտի համերգը, որոնց ընթացքին Քահիրէի սիմֆոնիք նուագախումբը Արամ Խաչատուրեանի ղեկավարութեամբ կատարած է երգահանի սիմֆոնիք ստեղծագործութիւնները»։ Նոյն յօդուածին մէջ կը նշուի նաեւ, որ Արամ Խաչատուրեանի լիբանանեան այցելութիւն-համերգային գործունէութիւնը մեծ դեր ունեցած է արաբական կատարողական արուեստի զարգացման գործին մէջ։ Նիւթի մը սահմաններուն մէջ շատ չծաւալուելով՝ նշենք, որ Հայաստանի ազգային գրադարանը տակաւին պիտի անդրադառնայ այս նիւթին։ Հետեւեցէ՛ք գրադարանի բոլոր հրապարակումներուն։