Հայաստանի ազգային գրադարանը համալրուած է հայագիտական նոր հրատարակութեամբ։ «Հայաստան քաղաք» (Arménie Ville) երկլեզու (անգլերէն, իտալերէն) պատկերագիրքը, որ հրատարակուած է 2016-ին, իտալացի լուսանկարիչ Քլաուտիո Կոպպիի (Claudio Gobbi) բազմամեայ նախագծի արդիւնք է, որ մեկնարկած է 2007-ին՝ Փարիզի մէջ գտնուող «Cité Internationale des Arts»-ի մէջ՝ համընկնելով Ֆրանսայի մէջ Հայաստանի տարուան հետ։

Այս բացառիկ հրատարակութիւնը գրադարանին նուիրած է հոլանտացի հայագէտ, թարգմանիչ Աննա Մարիա Մաթթարը (Anna Maria Mattaar)։ Հեղինակը շուրջ տասը տարի ճամբորդած է աւելի քան 25 երկրներու մէջ՝ լուսանկարելով աւելի քան 125 հայկական եկեղեցիներ։ Գիրքը իւրայատուկ փորձ է՝ քարտէսագրելու հայկական ճարտարապետութեան տարածումն ու զարգացումը՝ ինչպէս Հայաստանի, այնպէս ալ սփիւռքի մէջ։

«Հայաստան քաղաք»-ը ոչ միայն գեղարուեստական պատկերագիրք մըն է, այլեւ մշակութային եւ պատմական ուսումնասիրութիւն մը, որ կը ներկայացնվ այն ճանապարհը, որմով հայկական եկեղեցական ճարտարապետութիւնը՝ իր պարզ, բայց ճշգրիտ կառուցուածքով, պահպանած է ինքնութիւնը նոյնիսկ օտար երկրներու մէջ։ Լուսանկարներու շարքը ուղեկցուած է վերլուծական գրութիւններով՝ անդրադառնալով մշակութային յիշողութեան, վանքերու վերափոխուած կամ լքուած վիճակին եւ հայկական ինքնութեան պահպանման՝ ճարտարապետութեան միջոցաւ։