Հայաստանի ազգային գրադարանը ձեռք բերած է երկու հազուագիւտ հրատարակութիւն։ Գրադարանի գնած այդ գիրքերէն մէկը Եփրեմ Ասորւոյ «Գիրք աղօթից»-ն է։ Սուրբ Եփրեմ Ասորին ապրած է 4-րդ դարուն, Ասորիքի մէջ: Ան մինչեւ 5-րդ դարը ներառեալ ապրած տասներկու տիեզերական սուրբ վարդապետներէն մէկն է։ Ծնած է Մծբին քաղաքը, 306 թուին,ք րիստոնեայ ծնողներէ: Եփրեմ Ասորւոյ գործերուն զգալի մէկ մասը պահպանուած է հայերէն թարգմանութիւններով։ Ասորւոյ «Գիրք աղօթից»-ը լոյս տեսած է Կ.Պոլսոյ մէջ, Մարտիրոս Սարգիսեանի տպարանին մէջ, 1734 թուին։ Ունի 95 զարդափակ էջ։ Գիրքին յիշատակարանին մէջ հրատարակիչը կը խնդրէ յիշել իր ծնողները, եղբայրները։ Ամէնավերջը կը խնդրէ յիշել նաեւ զինքը. «... զանպիտան տպողս զՄարտիրոս չնչին դպիրս»։

Ազգային գրադարանի օրինակին մէջ գիրքին տիտղոսաթերթը եւ 2-րդ էջը կը բացակային։ Գրադարանը նոյն գիրքին թուային օրինակը ունի, որ հասանելի է «Հայ գիրք» շտեմարանին մէջ եւ թուայնացուած է Մատենադարանի օրինակէն։ Երկրորդ ձեռքբերումը 1888 թուին Կ.Պոլսոյ Ա. Յ. Պոյաճեան տպարանէն հրատարակուած հայատառ թրքերէն Աստուածաշունչն է։

Երկու գիրքերն ալ գրադարանին համար նոր միաւորներ են, որոնք անցեալին չենք ունեցած։ Գրադարանին հայագիտական հաւաքածոներուն յետադարձ համալրումը մեր առաջնահերթութիւններէն մէկն է։